Директорката на ЈЗУ Специјализирана болница за геријатриска и палијативна медицина, прим. д-р Ленче Нелоска, гостуваше на телевизијата Newsmax Balkans, каде зборуваше за улогата и значењето на болницата, како и за разликата помеѓу здравствените и социјалните услуги за стари лица.

Д-р Нелоска нагласи дека постои суштинска разлика која честопати не е доволно јасна во јавноста – ЈЗУ Специјализирана болница за геријатриска и палијативна медицина е болница, а не дом за стари. „Во болница имате здравствена услуга, а во домовите за стари има социјална услуга. За тоа да биде поедноставно јас го споредувам со децата – здраво дете оди во градинка, болно дете оди на педијатрија. Така е и кај старите лица – условно здравите, оние коишто се функционални треба да одат во дом, а тие што се болни треба да одат во Геријатрија," истакна д-р Нелоска.

Директорката додаде дека тимот на болницата постојано се труди да излезе во пресрет на граѓаните и да обезбеди најдобра можна здравствена грижа за постарата популација.