Како Европа може да ги намали нееднаквостите во геријатриската грижа и да обезбеди постарите лица да добиваат висококвалитетна здравствена заштита, без оглед на тоа каде живеат?

На 16-ти Октомври 2026 во Брисел во Европскиот лекарски дом – Domus Medica Europaea се одржа завршниот состанок на 4-годишниот проект COST Action 21122 PROGRAMMING (Promoting Geriatric Medicine in Countries where It Is Still Emerging) под наслов „Од образование до влијание врз здравствените политики во Европа“

Директорката прим. д-р Ленче Нелоска, како поканет учесник на панелот на општествени чинители ги претстави нашите планови за идниот развој на геријатриската медицина во нашата установа и пошироко во нашиот здравствен систем.

Состанокот се одржи во Domus Medica Europaea во Брисел и означи завршување на четиригодишната меѓународна соработка, истовремено отворајќи перспектива за тоа како знаењата, образовните ресурси и алатките развиени во рамките на проектот PROGRAMMING можат да се преточат во здравствени политики и клиничка практика. Настанот беше под покровителство на Европскиот парламент, со што се нагласува европската димензија на предизвиците на кои се фокусира CA PROGRAMMING, како и важноста од унапредување на грижата за постарите возрасни лица низ цела Европа.

Д-р Билјана Петреска-Зовиќ, интернист-супспец.геријатар, е дел од проектот од самиот почеток и член на управувачкиот одбор на PROGRAMMING COST Action 21122. Во проектот учествуваат и дел од докторите и медицинските сестри од нашата установа: д-р Лидија Павлеска, д-р Павлинка Милосављевиќ, д-р Дима Илиеска, д-р Маја Спирова, мед.сестра Катерина Митревска и Весна Попов. Во рамките на овој проект во фебруари 2024 година во Скопје се одржа голем симпозиум со учество на еминентни професори-геријатри од странство и професори од Медицинскиот факултет во Скопје и претставници од СЗО. Се спроведоа неколку меѓународни истражувања за мапирање на потребите за едукација од областа геријатриска медицина во различни локални контексти и се објавија повеќе публикации во списанија со импакт фактор.

На состанокот се прикажаа сумирано сите резултати од оваа COST акција, достигнувањата, завршените истражувачки проекти и публикации. Учеството во PROGRAMMING COST акцијата донесе значајни придобивки во промовирање на Геријатриската медицина како посебна гранка и супспецијалност кај нас, а ќе има значаен одраз и на развојот на нашата установа во иднина.